Buail le Denise Jeffers
Liagóir, Aonad Gharda Cósta Chathair na Mart
Feidhmíonn Denise Jeffers mar Liagóir le hAonad Gharda Cósta Chathair na Mart, stiúrann agus oibríonn sí an bád tarrthála le linn glaoch amach, agus is uirthi atá an fhreagracht iomlán as an soitheach, as an gcriú agus as na cinntí a dhéantar ar an uisce.
“Ról is ea é ina n‑éilítear smaointeoireacht thapa agus ceannaireacht láidir, i ndálaí dúshlánacha go minic, amhail farraigí garbha, droch‑infheictheacht agus staideanna atá criticiúil ó thaobh ama. Tá ceannaireacht agus iontaoibh ina gcuid mhór den ról. Bíonn tú ag brath go mór ar do chriú, agus bíonn siadsan ag brath ortsa chun guaim a choinneáil ort féin, cinntí soiléire a dhéanamh agus aird an uile dhuine a choinneáil ar an ngnó, go háirithe nuair a bhíonn brú ann.”
D’fhás Denise aníos le hais na farraige agus bhí sí gafa leis an saol muirí ó bhí sí óg. Is as Inis Goirt i gCuan Mó, Co. Mhaigh Eo dá hathair – mar a bhfuil teach solais inar oibrigh a seanathair agus a huncail araon mar fhreastalaithe tí solais. D’fhág na samhraí a caitheadh ar an oileán go rabhthas timpeallaithe ag báid, taoidí agus fírinní an tsaoil a bhí múnlaithe ag an bhfarraige.
“I ndáiríre, thug sin ardmheas ar an bhfarraige dom ó bhí mé óg. De réir mar a chuaigh mé in aois, theastaigh uaim rud éigin a thabhairt ar ais do mo phobal, agus domsa, bhí ciall ag baint leis sin a chónascadh le rud éigin lenar bhraith mé chomh nasctha sin cheana féin. Bhraith mé gur oir an Garda Cósta go paiteanta mar bhí mé in ann an cúlra agus an paisean sin a úsáid ar bhealach lena bhféadfaí cuidiú le daoine i ndáiríre.”
Is múinteoir bunscoile í Denise agus chuaigh sí isteach in Aonad Chathair na Mart in 2017. Ina cáil mar Liagóir, tá ceannaireacht, cumarsáid agus feasacht staide bunriachtanach. Bíonn criúnna ag brath ar threo soiléir, go háirithe nuair atá cuid mhór brú ann, agus bíonn obair foirne mar thaca faoi gach oibríocht. Is cuma má táthar i mbun cuardach ar dhaoine atá ar iarraidh, ag freagairt do theagmhais mhuirí, ag tabhairt garchabhrach, ag tacú le hoibríochtaí héileacaptair nó ag plé leis an bpobal le linn tráthanna strusmhara, cuirtear an bhéim i gcónaí ar shábháilteacht, ar ghairmiúlacht agus ar chuidiú leo sin atá i ngátar.
Mar chomhalta den Gharda Cósta, tairgtear réimse leathan oiliúna agus deiseanna. Chuir Denise cúrsaí i gcrích i Meánleibhéal agus Ardleibhéal Náisiúnta den Bhád Innill, Loingseoir Stiúrach SAR, Scileanna Ordaithe agus, ar deireadh thiar, an measúnú Liagóra. Chuir sí cáilíochtaí breise i gcrích freisin amhail Scileanna Cuardaigh Allamuigh, Bainisteoir Cuardaigh, GPS SAR, oibríocht raidió VHF, láimhsiú sábháilte, Freagairt Garchabhrach, airdeall féinmharaithe agus sábháilteacht uisce.
“Le déanaí, roghnaíodh mé chun ionadaíocht a dhéanamh do Gharda Cósta na hÉireann ag an imeacht Mná in SAR in Sydney in 2025. Deis den scoth a bhí ann le dul i mbun oiliúna i dteannta foirne cuardaigh agus tarrthála idirnáisiúnta eile, agus foghlaim uathu, eispéiris a chomhroinnt agus léargas a fháil ar an dóigh a n‑oibríonn siad.”
Is é an rud is mó a thaitníonn le Denise faoi bheith mar dhuine de Gharda Cósta na hÉireann an chomrádaíocht.
Bíonn daoine timpeall ort a bhfuil an dearcadh céanna acu agus atá agat féin agus tá siad uile ann ar an gcúis chéanna – chun cuidiú le daoine eile – agus cothaítear caidreamh an‑mhaith a bhuí leis sin. Bíonn tú i gcónaí ag cur brú ort féin chun feabhsú. Taitníonn sé liom freisin a bheith mar dhuine de sheirbhís 24/7, 365 lá, atá ann don phobal. Tá rud éigin an‑speisialta ag baint lena thuiscint go bhfuil tú mar dhuine d’fhoireann ar a mbíonn daoine ag brath in am an ghátair. Domsa, fágann an meascán d’obair foirne, forbairt phearsanta agus fíorbhraistint chuspóra go bhfuil sé chomh tairbheach sin.
Bí ag obair le Garda Cósta na hÉireann
An bhfuil gairm thairbheach á lorg agat inar féidir leat difear ceart a dhéanamh? Tairgeann Garda Cósta na hÉireann deiseanna iontacha do dhaoine atá paiseanta faoi shábháilteacht mhuirí agus faoi chuidiú le daoine eile.
Earcaítear ár róil bhuana uile trí publicjobs.ie, an suíomh gréasáin oifigiúil le haghaidh gairmeacha sa tseirbhís phoiblí in Éirinn. Ar an suíomh sin, is féidir leat folúntais reatha a chuardach, sainchuntais phoist mhionsonraithe a léamh agus foláirimh a chur ar bun ionas nach gcaillfidh tú oscailt nua go brách.