Sábháilteacht Cósta

Cuireann siúlóid aille radhairc fhíoráille agus braistint éalaithe ar fáil – ach tá rioscaí ag baint léi nach mbíonn infheicthe i gcónaí. Is féidir le haillte a bheith níos éagobhsaí ná mar is cosúil, agus is féidir leis na dálaí athrú go tapa. Is éard atá i gceist le bheith slán ná a bheith ullmhaithe agus a bheith aireach.

Leideanna Sábháilteachta Cósta

1.Seiceáil an aimsir sula n imíonn tú

Is féidir leis an ngaoth, leis an mbáisteach agus leis an gceo conairí aille a dhéanamh contúirteach. Seiceáil réamhaisnéis na haimsire i gcónaí agus seachain siúlóidí aille i ndrochaimsir.

2.Fan ar chonairí marcáilte

Is féidir le faobhair na haille a bheith éagobhsaí agus d’fhéadfaidís creimeadh. Cloígh le conairí ainmnithe agus coinnigh achar slán ón bhfaobhar.

3.Cinntigh go mbeidh d’fhón luchtaithe

I gcás éigeandála, is féidir le fón feidhmiúil a bheith ina tharrthálaí. Cinntigh go mbeidh sé luchtaithe go hiomlán sula mbailíonn tú leat.

4.Inis do dhuine éigin cé na pleananna atá agat

Má tá tú ag dul ag siúl i d’aonar, inis do dhuine éigin cá bhfuil tú ag dul agus cathain is dóigh leat a fhillfidh tú.

5.Seachain aillte a dhreapadh nó teacht anuas díobh

Níor cheart aillte a dhreapadh murar cuireadh an oiliúint cheart ort agus mura bhfuil tú feistithe. Fágann carraigeacha scaoilte agus titim thobann go bhfuil sé thar a bheith contúirteach sin a dhéanamh.

6.Tabhair aird ar chomharthaí – ach ná bí ag brath orthu

Tá comharthaí rabhaidh tábhachtach, ach ní bhíonn gach contúirt infheicthe ná marcáilte. Is féidir nach léir creimeadh, talamh scaoilte ná titim thobann.

7.Coinnigh súil ghéar ar leanaí

Ba cheart leanaí a choimeád i bhfad ó fhaobhair aillte agus faoi mhaoirseacht sheasta.

8.Coimeád madraí ar éill

Is féidir go mbainfear geit as madraí atá an‑traenáilte fiú nó is féidir leo dul sa tóir ar fhiadhúlra in aice le haillte. Coimeádann iall slán iad. Má thiteann siad le binn, ná téigh ina ndiaidh, glaoigh ar 999 agus abair go bhfuil an Garda Cósta uait

9.I gcás éigeandála, glaoigh ar 112 nó 999

Abair go bhfuil an Garda Cósta uait. Sábháiltear beathaí a bhuí le gníomh tapa.

Siúlóid aille

Is iontach an t‑eispéireas é siúlóid a dhéanamh feadh bhruach an aigéin, ach is féidir leis an talamh faoi do chosa a bheith i bhfad níos leochailí ná mar a dhealraíonn sé. Chun bheith slán, cloígh le conairí marcáilte i gcónaí agus coimeád achar cuí ón gciumhais, ós rud é gur féidir leis an ngaoth séideadh go tobann nó leis an ithir creimeadh gan choinne.

Coinnigh i bhfad siar ón bhfaobhar

Fágann carraigeacha scaoilte, creimeadh agus titim thobann go mbíonn faobhair aille dothuartha. Ní fiú dul sa seans leis ar mhaithe le haon ghrianghraf.

Bí aireach

Má lorgaíonn tú an uillinn fhoirfe, is féidir nach mbeidh tú feasach ar do thimpeallacht. Tabhair tús áite i gcónaí don tsábháilteacht.

Ná dreap ná ná crom os cionn aille chun pictiúr nó radharc níos fearr a fháil

Tá sé thar a bheith contúirteach carraigeacha nó talamh éagobhsaí a dhreapadh ar mhaithe le grianghraf agus ba cheart sin a sheachaint.

Seachain an ghaoth

Is féidir le gustaí láidre dul i bhfeidhm ar do chothrom – go háirithe nuair atá tú dírithe ar d’fhón nó ar do cheamara.

Ná lig do leanaí ná do pheataí dul ag fánaíocht ar mhaithe le grianghraf

Coimeád in aice láimhe iad agus i bhfad ó fhaobhair aille. Tá a gcuid sábháilteachta níos tábhachtaí ná aon ghrianghraf.

I gcás éigeandála, glaoigh ar 112 nó 999

Abair go bhfuil an Garda Cósta uait. Sábháiltear beathaí a bhuí le gníomh tapa.

Lúblochanna taoide

Tarlaíonn lúbloch taoide nuair a leithlisíonn taoidí atá ag líonadh codanna den imeallbhord, amhail oitreacha gainimh, cabhsaí nó lomáin charraigeacha, rud a fhágann go mbíonn siúlóirí sáinnithe gan aon bhealach slán ar ais. Is féidir go ndealraíonn sé go bhfuil na limistéir sin inrochtana le taoide íseal ach is féidir leo a bheith ina ngaistí contúirteacha faoi mar a fhilleann an t‑uisce – ar bhealach níos tapúla agus níos ciúine ná mar a bhítear ag súil leis go minic.

Seiceáil amanna taoide sula n imíonn tú

Pleanáil do shiúlóid timpeall taoide íseal agus cuir cuid mhór ama i leataobh chun filleadh.

Ná féach le bheith ag siúl trí uisce atá ag ardú

Is féidir le sruthanna a bheith láidir agus dothuartha. Cas ar ais mura bhfuil tú cinnte.

Bíodh cur amach agat ar do bhealach

Is féidir le conairí áirithe a bheith slán le taoide íseal ach imeacht as radharc go hiomlán nuair a thagann an taoide isteach.

I gcás éigeandála, glaoigh ar 112 nó 999

Abair go bhfuil an Garda Cósta uait. Sábháiltear beathaí a bhuí le gníomh tapa.

Láib agus gaineamh súraic

Is limistéir chósta ísle iad réileáin láibe agus riasca goirt a bhíonn in aice le hinbhir, bánna agus góilíní taoide go minic. Féadfaidh cuma sholadach a bheith orthu, ach tá siad déanta de dhríodar leathbháite bog lenar féidir cosa, lapaí nó rothaí a cheapadh. Is féidir le dálaí atá cosúil le gaineamh súraic titim amach nuair a sháithíonn uisce gaineamh nó siolta, rud a fhágann go bhfuil sé éagobhsaí agus gur deacair éalú uaidh.

Seachain Réileáin Láibe agus Riasca Goirt

Is féidir leis na limistéir sin a bheith níos contúirtí ná mar a shílfeá. Is féidir le talamh, a bhfuil cuma dhaingean air, imeacht faoi do chosa.

Ná Féach le Limistéir Lábacha a Thrasnú

Is féidir le láib a bhfuil cuma thanaí uirthi fiú a bheith domhain agus tiubh. Cas siar agus aimsigh bealach níos sábháilte.

Coimeád Madraí agus Leanaí in Aice Láimhe

Is féidir go siúlfaidh taiscéalaithe fiosracha leo isteach i dtalamh contúirteach. Fan ar chonairí marcáilte agus coimeád peataí ar éill.

I gcás éigeandála, glaoigh ar 112 nó 999

Abair go bhfuil an Garda Cósta uait. Sábháiltear beathaí a bhuí le gníomh tapa.

Carraigeacha agus pluaiseanna

Is féidir le línte cladaigh agus pluaiseanna mara a bheith galánta ach contúirteach. Bíonn rioscaí tromchúiseacha ag baint le dromchlaí sleamhna, carraigeacha atá ag titim agus taoidí atá ag líonadh.

Ná Téigh Isteach i bPluaiseanna Mara

De dheasca taoidí athraitheacha, is féidir go mbeidh tú sáinnithe in uisce atá ag ardú.

Seachain Titim Smionagair

Is féidir le creimeadh agus carraigeacha scaoilte a bheith ina gcúis le titim thobann – bí aireach.

Ná Bí ag Dreapadh ar Charraigeacha Fliucha nó Sleamhna

Fágann algaí agus cáitheadh na farraige go mbíonn carraigeacha sleamhain agus contúirteach.

I gcás éigeandála, glaoigh ar 112 nó 999

Abair go bhfuil an Garda Cósta uait. Sábháiltear beathaí a bhuí le gníomh tapa.

Seicliosta sábháilteachta

  • Bí ar an eolas faoina bhfuil i gceist le réileáin láibe agus riasca goirt – is féidir go mbeidh cuma sholadach orthu ach is féidir leo cosa, lapaí nó rothaí a cheapadh
  • Ná bí ag súil trasna talamh lábach nó bhog, go háirithe gar d’inbhir nó réileáin thaoidmheara
  • Taobh le talamh éagobhsaí, coimeád madraí agus leanaí in aice láimhe agus ar éill
  • Seiceáil amanna taoide roimh thránna, pluaiseanna nó cabhsaí a thaiscéaladh
  • Bí feasach ar lúblochanna taoide – is féidir le huisce atá ag ardú codanna den chladach a leithlisiú go tapa agus go ciúin
  • Ná féach le siúl trí thaoide atá ag líonadh – is féidir le sruthanna a bheith láidir agus dothuartha
  • Ná téigh isteach i bpluaiseanna farraige ach amháin má tá tú cinnte d’uainiú na taoide
  • Ná dreap ar charraigeacha fliucha ná sleamhna – is féidir leo a bheith éagobhsaí agus contúirteach
  • Caith bróga téagartha agus éadaí a oireann don aimsir
  • Tabhair leat bia, uisce agus fón póca atá luchtaithe go hiomlán
  • Cloígh le conairí marcáilte agus seachain conairí neamhfhoirmiúla trasna talamh bhog nó charraigeach
  • Inis do dhuine éigin cé na pleananna atá agat agus cathain is dóigh leat a fhillfidh tú
  • I gcás éigeandála, glaoigh ar 112 nó 999 agus abair go bhfuil an Garda Cósta uait

Cuimhnigh

Coinnigh siar, coinnigh ard agus coinnigh tirim.